ଶ୍ରୀନଗର ୧୬।୬: ଜାମ୍ମୁ କାଶ୍ମୀରରେ ପୁଣି ଭୂକମ୍ପ ଅନୁଭୂତ ହୋଇଛି । ରିକ୍ଟର ସ୍କେଲରେ ଭୂକମ୍ପର ତୀବ୍ରତା ୩.୮ ରହିଛି । ସୋମବାର ସକାଳେ ମଧ୍ୟ ରାଜ୍ୟରେ ଭୂକମ୍ପ ଅନୁଭୂତ ହୋଇଥିଲା । ସକାଳ ୪ଟା ୩୬ମିନିଟ୍ରେ ଏକ ଭୂକମ୍ପ ଝଟ୍କା ଅନୁଭୂତ ହୋଇଥିଲା । ଯାହାର ତୀବ୍ରତା ରିକ୍ଟର ସ୍କେଲରେ ୩.୨ ଥିଲା ।
ଏହାପୂର୍ବରୁ ଜୁନ୍ ୯ ତାରିଖରେ ଜାମ୍ମୁ କାଶ୍ମୀରରେ ଭୂକମ୍ପ ଅନୁଭୂତ ହୋଇଥିଲା । ଏହାର ତୀବ୍ରତା ରିକ୍ଟର ସ୍କେଲରେ ୩.୯ ବୋଲି ଆକଳନ କରାଯାଇଥିଲା । ଏହି ଭୂକମ୍ପର କେନ୍ଦ୍ର ଶ୍ରୀନଗରର ୧୪ କିଲୋମିଟର ଉତ୍ତରରେ ଏବଂ ଗାଣ୍ଡରବେଲ୍ଟର ୭ କିଲୋମିଟର ଦକ୍ଷିଣ-ପୂର୍ବରେ ଥିଲା ।
ସେହିଭଳି ଗୁଜୁରାଟରେ ୨୪ ଘଣ୍ଟା ମଧ୍ୟରେ ତୃତୀୟ ଥର ପାଇଁ ଭୂକମ୍ପ ଅନୁଭୂତ ହୋଇଥିଲା । ଭୂକମ୍ପର ତୀବ୍ରତା ୪.୧ ରହିଥିଲା । ଭୂକମ୍ପର କେନ୍ଦ୍ରସ୍ଥଳ ଭୁଜ୍ ରହିଥିଲା । ଭୁଜର ଭାଚୁଆ ନିକଟରେ ୨୪ ଘଣ୍ଟାରେ ୧୮ ଥର ଭୂକମ୍ପ ଝଟ୍କା ଅନୁଭୂତ ହୋଇଥିଲା । ଯେଉଁଥିରୁ ୧୫ଟି ଝଟ୍କା ସାମାନ୍ୟ ଥିଲା । ବାରମ୍ବାର ଭୂକମ୍ପ ଯୋଗୁଁ ଲୋକମାନେ ଆତଙ୍କିତ ଅବସ୍ଥାରେ ଅଛନ୍ତି । ଏହାପୂର୍ବରୁ ରବିବାର ଦିନ କୁଚରେ ୫.୫ ତୀବ୍ରତାର ଭୂକମ୍ପ ଅନୁଭୂତ ହୋଇଥିଲା ।
ଏହାପୂର୍ବରୁ ଜୁନ୍ ୮ରେ ଦିଲ୍ଲୀ-ଏନସିଆରରେ ଭୂକମ୍ପ ଅନୁଭୂତ ହୋଇଥିଲା । ରିକ୍ଟର ସ୍କେଲରେ ଭୂକମ୍ପର ତୀବ୍ରତା ୨.୧ ଥିଲା । ନ୍ୟାସନାଲ ସେଣ୍ଟର ଫର୍ ସେସମୋଲୋଜି ଅନୁଯାୟୀ, ହରିୟାଣାର ଗୁରୁଗ୍ରାମର ୧୩ କିଲୋମିଟର ପଶ୍ଚିମ-ଉତ୍ତର-ପଶ୍ଚିମ ଦିଗରେ ଏକ ସ୍ବଳ୍ପ ତୀବ୍ର ଭୂକମ୍ପ ହୋଇଥିଲା । ଏହାର ଗଭୀରତା ୧୮ କିଲୋମିଟର ଥିଲା ଏବଂ ଏହା ଅପରାହ୍ନ ସମୟରେ ଅନୁଭୂତ ହୋଇଥିଲା ।
