ନୂଆଦିଲ୍ଲୀ୪/୧୨: ସୁଦାନରେ ଏକ ସେରାମିକ୍ ଇଣ୍ଡଷ୍ଟ୍ରିରେ ବିସ୍ଫୋରଣ ଘଟି ୨୩ ଜଣଙ୍କ ମୃତ୍ୟୁ ହୋଇଥିବା ବେଳେ, ମୃତକଙ୍କ ମଧ୍ୟରେ ଅଛନ୍ତି ୧୮ ଭାରତୀୟ । ଉତ୍ତର ଖୋର୍ତ୍ତୁମର ଏକ ଇଣ୍ଡଷ୍ଟ୍ରିଆଲ୍ ଏଷ୍ଟେଟରେ ଥିବା ଫ୍ୟାକ୍ଟ୍ରିରେ ଗ୍ୟାସ୍ ଟ୍ୟାଙ୍କରରେ ବିସ୍ଫୋରଣ ହୋଇଥିଲା । ଚାହୁଁଚାହୁଁ ସାରା ଫ୍ୟାକ୍ଟ୍ରି ଓ ଆଖପାଖ ଅଞ୍ଚଳରେ କଳା ଧୁଆଁ ବ୍ୟାପିଯାଇଥିଲା । ଭାରତୀୟ ଦୂତାବାସର ସୂଚନା ଅନୁସାରେ, ଏହି ଫ୍ୟାକ୍ଟ୍ରିରେ ପାଖାପାଖି ୭୦ ଜଣ ଭାରତୀୟ କାମ କରୁଥିଲେ । ପ୍ରାଣ ହରାଇଥିବା ବ୍ୟକ୍ତିଙ୍କ ମଧ୍ୟରୁ ଅଧିକାଂଶ ବିହାର, ଉତ୍ତର ପ୍ରଦେଶ ଓ ରାଜସ୍ଥାନର ।
ଘଟଣାରେ ୧୩୦ ଜଣ ଆହତ ହୋଇଛନ୍ତି । ତେବେ ୧୬ ଜଣ ଭାରତୀୟଙ୍କ ପତ୍ତା ମିଳୁନାହିଁ । ତେଣୁ ମୃତକଙ୍କ ସଂଖ୍ୟା ଆହୁରି ବଢ଼ିବା ଆଶଙ୍କା କରାଯାଉଛି । ଫ୍ୟାକ୍ଟ୍ରିରେ ଅଗ୍ନି ନିରାପତ୍ତା ବ୍ୟବସ୍ଥା ନଥିଲା ଏବଂ ସେଠାରେ ଆଉ କିଛି ଅତି ଦହନୀୟ ସାମଗ୍ରୀ ଗଚ୍ଛିତ ଥିବାରୁ ନିଆଁ ଅଧିକ ଭୟଙ୍କର ରୂପ ଧାରଣ କରିଥିଲା ।
