ଢେଙ୍କାନାଳ, ୩୧/୦୭: ଘର ପାଚେରି ନିର୍ମାଣ ପାଇିଁ ଖୋଳାଯାଇଥିବା ନିଅଁରେ ପଡି ୨ଶିଶୁଙ୍କର ମୃତ୍ୟୁ ଘଟିଛି । ଢେଙ୍କାନାଳ ଭୁବନ ଥାନା ଅନ୍ତର୍ଗତ କହ୍ନେଇପାଳ ଗ୍ରାମରେ ଏପରି ମର୍ମନ୍ତୁଦ ଅଘଟଣକୁ ଗ୍ରାମବାସୀ ମର୍ମାହତ ହୋଇପଡିଛନ୍ତି । ମୃତ ଶିଶୁ ଦୁଇଜଣ ହେଲେ କହ୍ନେଇପାଳ ଗ୍ରାମର ପ୍ରଦିପ ପାତ୍ରଙ୍କ ୬ବର୍ଷର ଝିଅ ପ୍ରିୟଙ୍କା ଓ ଶେଷଦେବ ପାତ୍ରଙ୍କ ୭ବର୍ଷର ଝିଅ ସୃତି ପାତ୍ର।
ସୂଚନା ମୁତାବକ, କହ୍ନେଇପାଳ ଗ୍ରାମର ରାସ୍ତା ପାର୍ଶ୍ୱରେ ଥିବା ନଖିଆ ପାତ୍ର ତାଙ୍କ ଘର ପାଚେରୀ ଦେବା ପାଇଁ ନିଅଁ ଖୋଳିଥିଲେ । ତେବେ ବର୍ଷା ଯୋଗୁଁ ଏହି ନିଅଁ ବା ଗାତରେ ପାଣି ଭର୍ତ୍ତି ହୋଇ ରହିଥିଲା । ଶନିବାର ସଂଧ୍ୟା ସମୟରେ ପ୍ରିୟଙ୍କା ଓ ଶୃତି ଦୁଇ ସାଙ୍ଗ ହୋଇ ଜଳଖିଆ ଦୋକାନକୁ ଯାଉଥିବା ବେଳେ ଅସାବଧାନତା ବଶତଃ ଏହି ନିଅଁରେ ପଡି ଯାଇ ବୁଡି ଯାଇଥିଲେ ।
ତେବେ ବହୁ ସମୟ ଧରି ୨ଜଣ ଶିଶୁ ଘରକୁ ନଫେରିବାରୁ ପରିବାର ଲୋକ ବହୁ ଖୋଜାଖୋଜି କରିଥିଲେ । ପରେ ଏହି ପାଚେରୀ ଗାତ ନିକଟରେ ଚପଲ ପଡିଥିବାର ଦେଖିବାକୁ ପାଇଥିଲେ । ଉଭୟଙ୍କୁ ଉଦ୍ଧାର କରି ପରିବାର ଲୋକ କାମାକ୍ଷାନଗର ମେଡିକାଲରେ ଭର୍ତ୍ତି କରିଥିଲେ। ମାତ୍ର ଡାକ୍ତରଖାନାରେ ଡାକ୍ତର ଉଭୟ ଶିଶୁଙ୍କୁ ମୃତ ଘୋଷଣା କରିଥିବା ଜଣାପଡିଛି ।ଏହାକୁ ନେଇ ମେଡିକାଲ ପରିସରରେ ଏକ ଶୋକାକୁଳ ପରିସ୍ଥିତି ସୃଷ୍ଟି ହୋଇଥିଲା।
