ଭୁବନେଶ୍ୱର ୧୬/୨ : ଆଜି ଭୁବନେଶ୍ୱର ଆସୁଛି ପାର୍ଥିବ ଶରୀର | ପୁଲୱାଲରେ ବିସ୍ଫୋରଣରେ ସହିଦ ହୋଇଥିବା ୨ ଓଡ଼ିଆ ଯବାନଙ୍କ ପାର୍ଥିବ ଶରୀର ଆଜି ଭୁବନେଶ୍ୱର ଆସୁଛି | ଭୁବନେଶ୍ୱର ବିମାନବନ୍ଦରରେ ଦୁଇ ସହିଦଙ୍କୁ ଗାର୍ଡ ଅଫ ଅନର ଦିଆଯିବ | ଦୁଇ ସହିଦଙ୍କ ପାର୍ଥିବ ଶରୀର ନିଜ ନିଜ ଜନ୍ମ ମାଟିକୁ ନିଆଯିବ |
ସୂଚନାଯୋଗ୍ୟ ଯେ, କାଶ୍ମୀର ପୁଲୱାମା ଆତଙ୍କୀ ହମ୍ଲାରେ ସହିଦ ହୋଇଛନ୍ତି ନିଆଳି ରତନପୁର ଗାଁର ମନୋଜ କୁମାର ବେହେରା । ବାପା ମାଙ୍କର ଏକମାତ୍ର ପୁଅଥିଲେ ମନୋଜ । ୨୦୦୬ରେ ସିଆରପିଏଫ୍ରେ ଯୋଗଦେଇଥିଲେ । ୨୦୧୭ରେ ବିବାହ କରିଥିଲେ । ଝିଅ ଜନ୍ମଦିନ ଯୋଗଦେଇ ଫେବ୍ରୁଆରୀ ୬ରେ ଫେରିଯାଇଥିଲେ କାର୍ଯ୍ୟସ୍ଥଳ କାଶ୍ମୀର । ଶ୍ରୀନଗର ଅଭିମୁଖେ ବାହାରିବା ବେଳେ ସକାଳେ ମାଙ୍କ ସହ କଥା ହୋଇଥିଲେ, କଥା ଦେଇଥିଲେ ମାର୍ଚ୍ଚରେ ଆସିବେ। ଏବେ ଆସିଲା ତାଙ୍କ ସହିଦ ହେବା ଖବର।
ସେହିଭଳି ସହିଦ ହୋଇଥିବା ଆଉଜଣେ ଓଡିଆ ପୁଅ ହେଉଛନ୍ତି ଜଗତସିଂପୁର ଶିଖର ଗାଁର ପ୍ରସନ୍ନ କୁମାର ସାହୁ । ୧୯୭୨ ମସିହାରେ ଜନ୍ମଗ୍ରହଣ କରିଥିଲେ ପ୍ରସନ୍ନ । ଗାଁରେ ପାଠପଢ଼ା ସରିବା ପରେ ୧୯୯୫ ମସିହାରେ ଦେଶମାତୃକାର ସେବା କରିବାକୁ ସିଆରପିଏଫର ୬୧ବାଟାଲିଅନରେ ଯୋଗଦେଇଥିଲେ । ତିନି ଭାଇଙ୍କ ଭିତରେ ଥିଲେ ସବା ସାନ । ନଭେମ୍ବର ମାସରେ ଗାଁକୁ ଆସିଥିଲେ । ବେଶ୍ ହସଖୁସିରେ ପୁଅର ଜନ୍ମଦିନରେ ଷୋଳପୂଜା କରିଥିଲେ । ଗାଁ ଲୋକଙ୍କୁ କଥା ଦେଇଥିଲେ ପୁଣି ଆସିବେ ହେଲେ ଆସିଲା ତାଙ୍କ ମୃତ୍ୟୁର ଖବର । ବାପା କାଶିନାଥ ସାହୁ, ମାଆ ଲଳିତା ସାହୁଙ୍କ ପାଖରେ ପତ୍ନୀ ମିନାରାଣୀ, ପୁଅ ଗଗନ ଆଉ ଝିଅ ରୁନିକୁ ଛାଡ଼ି ସେ ଦେଶ ପାଇଁ ସହିଦ ହୋଇଛନ୍ତି ।
