ପାଟନା, ୧୦।୦୧: ବିହାରରେ ଦୁଇଜଣ ଦଳିତ ନାବାଳିକାଙ୍କ ଅପହରଣ ଓ ହତ୍ୟା ପରେ ପୋଲିସ ଉପରେ ଗୁରୁତର ଅଭିଯୋଗ ଆସିଛି । ସବୁ ଜାଣି ମଧ୍ୟ ପୋଲିସ କାର୍ଯ୍ୟାନୁଷ୍ଠାନ ନେଇନଥିବା ଅଭିଯୋଗ ହୋଇଛି । ପରିବାର ଲୋକେ ଥାନାରେ ଅଭିଯୋଗ କରିଥିଲେ ବି ପୋଲିସ କେବଳ ଆଶ୍ୱାସନା ଦେଇ ଚୁପ୍ ରହିଯାଇଥିଲା । ଏହାର କିଛି ଦିନ ପରେ ୨ ଝିଅଙ୍କ ମୃତଦେହ ଏକ ପୋଖରୀରରୁ ମିଳିଥିଲା ।
ସୂଚନାନୁସାରେ, ବିହାରର ବୈଶାଳୀ ଜିଲ୍ଲାରେ ଜାନୁଆରୀ ୨ ତାରିଖରେ ୧୪ ଓ ୧୬ ବର୍ଷର ୨ ନାବାଳିକା ଘରୁ ହଠାତ ଗାଏବ ହୋଇଯାଇଥିଲେ । ଦୁଇ ନାବାଳିକା ସାଙ୍ଗ ଥିଲେ । ଏନେଇ ପୋଲିସରେ ଅଭିଯୋଗ ହୋଇଥିଲା । କିନ୍ତୁ ପୋଲିସ ନିଜେ ସେମାନଙ୍କୁ ଖୋଜିବା ବଦଳରେ ପରିବାର ଲୋକଙ୍କୁ ଖୋଜିବା ପାଇଁ ପରାମର୍ଶ ଦେଇଥିଲା ।
ଅଭିଯୋଗ ଦାଖଲର ୭ ଦିନ ପରେ ୨ ଝିଅଙ୍କୁ ଗଳିତ ମୃତଦେହ ଏକ ପୋଖରୀରୁ ମିଳିଥିଲା । ଅପହରଣ ନେଇ ପରିବାର ଲୋକେ ଗାଁର କିଛି ଯୁବକଙ୍କ ବିରୋଧରେ ମାମଲା ଦାଖଲ କରିଥିଲେ । କିନ୍ତୁ ପୋଲିସର ଖାମଖିଆଲି ମନୋଭାବ ପାଇଁ ଏହି ଅଘଟଣ ଘଟିଥିବା ଗାଁ ଲୋକେ କହିଛନ୍ତି । ତେବେ ମୃତଦେହ ଉଦ୍ଧାର ପରେ ପୋଲିସ ଆକ୍ସନ ମୋଡକୁ ଆସିଥିଲା ।
ମୃତଦେହକୁ ପୋଷ୍ଟମଟର୍ମ ପାଇଁ ପଠାଇ ପୋଲିସ ତଦନ୍ତ ଆରମ୍ଭ କରିଛି । ତେବେ ୨ ନାବାଳିକାଙ୍କୁ ଦୁଷ୍କର୍ମ କରାଯାଇଛି ନା ନାହିଁ ତାହା ସ୍ପଷ୍ଟ ହୋଇନାହିଁ ।