କୋରାପୁଟ, ୨୩/୧୦: କୋରାପୁଟରେ ଘଟିଛି ଅଭାବନୀୟ ଘଟଣା । ମହୁମାଛି ଆକ୍ରମଣରେ ୨ଜଣଙ୍କର ମୃତ୍ୟୁ ହୋଇଥିବା ବେଳେ ୩ ଜଣ ଆହତ ହୋଇଛନ୍ତି । ପୃଥକ୍ ପୃଥକ୍ ଭାବରେ ଜିଲ୍ଲାର ୨ଟି ସ୍ଥାନରେ ଘଟିଛି ଅଭାବନୀୟ ଘଟଣା। ଦଶମନ୍ତପୁରର ଚାଉଳକଣ୍ଟି ଓ କାକିରିଗୁମାର ଗୌଡଗୁଡାରେ ଘଟିଛି ଘଟଣା।
ଦଶମନ୍ତପୁରର ଚାଉଳକଣ୍ଟି ଗ୍ରାମର କିଛିଲୋକ କାଠ ସଂଗ୍ରହ ପାଇଁ ଜଙ୍ଗଲକୁ ଯାଉଥିବା ବେଳେ ମହୁମାଛି ଆକ୍ରମଣ କରିଥିଲା । ସେଥିରେ ଲୁକି ଜାନିଙ୍କ ଚିକିତ୍ସାଧିନ ଅବସ୍ଥାରେ ମୃତ୍ୟୁ ଘଟିଛି। ଘଟଣାରେ ୨ଜଣ ଆହତ ହୋଇଛନ୍ତି । ସେହିଭଳି କାକିରିଗୁମା ଥାନା ଗୌଡଗୁଡା ଗ୍ରାମର ୨ ଭଉଣି ଲକ୍ଷ୍ମୀ ମୁଦୁଲି ଓ ରତନ ମୁଦୁଲି ଜମିକୁ ଯାଉଥିବା ବେଳେ ମହୁମାଛି ଆକ୍ରମଣର ଶିକାର ହୋଇଥିଲେ। କୋରାପୁଟ ମେଡିକାଲରେ ରତନ ମୁଦୁଲିଙ୍କର ମୃତ୍ୟୁ ଘଟିଛି । ଅନ୍ୟ ଭଉଣୀଙ୍କର ଅବସ୍ଥା ଗୁରୁତର ରହିଥିବା ଚିକିତ୍ସା ଜାରି ରହିଛି। ମୃତ ୨ଜଣଙ୍କର କୋରାପୁଟ ଶହିଦ ଲକ୍ଷ୍ମଣ ନାୟକ ମେଡିକାଲ କଲେଜ ହସପିଟାଲରେ ଚିକିତ୍ସାଧିନ ଅବସ୍ଥାରେ ମୃତ୍ୟୁ ଘଟିଛି ।