ବେଙ୍ଗାଲୁରୁ ୧୨/୮: କରୋନା ସଙ୍କଟ କାଳରେ ସମସ୍ତଙ୍କୁ ଭିଡ଼କୁ ଯିବାକୁ ମନା କରାଯାଉଥିବାବେଳେ ଏପରି ସମୟରେ କର୍ଣ୍ଣାଟକର ବେଙ୍ଗାଲୁରୁରେ ହିଂସାକାଣ୍ଡ ଘଟିଛି। ମଙ୍ଗଳବାର ବିଳମ୍ବିତ ରାତିରେ ଫେସବୁକ୍ ପୋଷ୍ଟରୁ ଉତ୍ତ୍ୟକ୍ତ କିଛି ଲୋକ ଉତ୍ପାତ ମଚାଇଥିଲେ। ପୋଲିସ୍ ଷ୍ଟେସନ ଏବଂ ବିଧାୟକଙ୍କ ଘରକୁ ନିଆଁ ଲଗାଇ ଦେଇଥିଲେ।
ଏଠାରେ ଗାଡ଼ିଗୁଡ଼ିକ ମଧ୍ୟ ଜଳାଇ ଦିଆଯାଇଛି,ଏଟିଏମରେ ଭଙ୍ଗାରୁଜା କରାଯାଇଛି। ବିଧାୟକଙ୍କ ଘରକୁ ଟାର୍ଗେଟ୍ କରିବା ସହ ଆଖପାଖରେ ଥିବା ଲୋକେ ମଧ୍ୟ ଏଥିରେ ପ୍ରଭାବିତ ହୋଇଛନ୍ତି। ଯାହା ଫଳରେ ଲୋକଙ୍କ ଘରର ଝରକା ଭାଙ୍ଗି ଯାଇଛି। ଏହି ହିଂସାକାଣ୍ଡରେ ୨ଜଣଙ୍କ ମୃତ୍ୟୁ ହୋଇଥିବାବେଳେ ୬୦ପୋଲିସ୍ କର୍ମଚାରୀ ଗୁରୁତର ହୋଇଛନ୍ତି।
ବୁଧବାର ସକାଳେ ସ୍ଥାନୀୟ ବାସିନ୍ଦା ଘରୁ ବାହାରି ଘଟଣା ବିଷୟରେ ଜାଣି ପାରିଥିଲେ। ଏହା ବ୍ୟତୀତ ଚାରିଆଡ଼େ ପଥର ପଡ଼ିଥିଲା। ଏବେ ଏହି ଅଞ୍ଚଳରେ କର୍ଫ୍ୟୁ ଲଗାଯାଇଛି। ଏହା ଆଜି ରାତି ୧୨ଟା ଯାଏଁ ରହିବ। ଏହା ପରେ ପରିସ୍ଥିତିକୁ ଦେଖି ନିଷ୍ପତ୍ତି ନିଆଯିବ।
ମୁଖ୍ୟମନ୍ତ୍ରୀ ବିଏସ୍ ୟେଦୁରପ୍ପା ଟ୍ବିଟ୍ କରି ହିଂସାର ନିନ୍ଦା କରିଛନ୍ତି। ସେ ଲେଖିଛନ୍ତି ଯେ ସେ ଦୋଷୀଙ୍କ ବିରୁଦ୍ଧରେ କଡ଼ା କାର୍ଯ୍ୟାନୁଷ୍ଠାନ କରିବାକୁ ଆଦେଶ ଦେଇଛନ୍ତି।