ମୁମ୍ବାଇ,୨୫/୦୨: ଦେଶର ଅନେକ ରାଜ୍ୟରେ କରୋନା ଭାଇରସର ପ୍ରକୋପ ବୃଦ୍ଧି ପାଇବାରେ ଲାଗିଛି । ମହାରାଷ୍ଟ୍ରରେ କରୋନାର ବିସ୍ଫୋରକ ସ୍ଥିତି ସୃଷ୍ଟି ହୋଇଛି । ସୂଚନା ଅନୁସାରେ, ଓ୍ୱାସିମ୍ ଜିଲ୍ଲାର ଏକ ସ୍କୁଲ ହଷ୍ଟେଲରେ ରହୁଥିବା ୧୯୦ ଛାତ୍ର ପଜିଟିଭ୍ ଚିହ୍ନଟ ହୋଇଛନ୍ତି ।
ରିପୋର୍ଟ ଅନୁସାରେ, ରିସୋଡ୍ ତହସିଲର ଦେଗାଁଓ ସ୍ଥିତରେ ଥିବା ଆଶ୍ରମ ସ୍କୁଲରେ ପିଲାଙ୍କ ପଢିବା ସହ ରହଣୀ ବ୍ୟବସ୍ଥା ରହିଛି । ହଷ୍ଟେଲରେ ରହୁଥିବା ୧୯୦ ଛାତ୍ର କୋଭିଡ୍ ପଜିଟିଭ୍ ଚିହ୍ନଟ ହୋଇଛନ୍ତି । ସମସ୍ତ ଛାତ୍ରୀ ଅମରାବତୀରୁ ଆସିଥିଲେ । ମହାରାଷ୍ଟ୍ରରେ କରୋନା ଭାଇରସର ଦ୍ୱିତୀୟ ଲହରୀ ମଧ୍ୟ ଅମରାବତୀରୁ ଆରମ୍ଭ ହୋଇଥିଲା । ଏଠାରେ ମାର୍ଚ୍ଚ ୧ ଯାଏଁ ଲକଡାଉନ୍ ଲାଗୁ ହୋଇଛି ।
ମହାରାଷ୍ଟ୍ରରେ ଗତ ୨୪ ଘଣ୍ଟାରେ ୮୮୦୭ ନୂଆ କେସ୍ ସାମ୍ୱାକୁ ଆସିଛି । ଏହା ଅକ୍ଟୋବର ୧୮ ପରେ ସର୍ବାଧିକ ଦୈନିକ ମାମଲା । ଏହାସହ ୨୪ ଘଣ୍ଟାରେ ୮୦ ଜଣ ଆକ୍ରାନ୍ତ ପ୍ରାଣ ହରାଇଛନ୍ତି ।
ରାଜ୍ୟରେ କରୋନାର ନୂଆ ଷ୍ଟ୍ରେନ୍ ସାମ୍ନାକୁ ଆସିବା ପରେ ଆତଙ୍କ ଖେଳିଯାଇଛି । ପୂର୍ବରୁ କର୍ଣ୍ଣାଟକ ଓ ଗୁଜୁରାଟ ମହାରାଷ୍ଟ୍ରରୁ ଆସୁଥିବା ଲୋକଙ୍କ ଉପରେ କଟକଣା ଲଗାଇଛନ୍ତି । ବିଦର୍ଭରେ ମଧ୍ୟ କରୋନା ମାମଲା ବୃଦ୍ଧି ପାଉଛି । ପରିସ୍ଥିତିକୁ ନଜରରେ ରଖି ଶିରିଡି ସାଇ ବାବା ମନ୍ଦିରକୁ ମଧ୍ୟ ବନ୍ଦ କରିଦିଆଯାଇଛି ।
