Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ମେଡିକାଲ କଲେଜ ଓ ସିଟି ହସ୍ପିଟାଲ ଦାବିରେ ଢେଙ୍କାନାଳ ବନ୍ଦ : ବଜାର ଠପ୍, କୋର୍ଟରେ ତାଲା

ଢେଙ୍କାନାଳ ୧୪।୨: ଢେଙ୍କାନାଳ ଜିଲ୍ଲାରେ ମେଡିକାଲ କଲେଜ ଓ ସିଟି ହସ୍ପିଟାଲ ପ୍ରତିଷ୍ଠା ଦାବି ଜୋର ଧରିଛି । ଏପରିକି ଆଜି ନାଗରିକ କ୍ରିୟାନୁଷ୍ଠାନ କମିଟି ଡାକରାରେ ଢେଙ୍କାନାଳ ବନ୍ଦ କରାଯାଇଛି । ଏଥିରେ ଓକିଲ ସଂଘଠାରୁ ଆରମ୍ଭ କରି ଜିଲ୍ଲା ସାମ୍ବାଦିକ ସଂଘ, ବାଣିଜ୍ୟ ସଂଗଠନ, ମିଳିତ ବଜାର କମିଟି, ଘରୋଇ ବସ୍ ମାଲିକ ସଂଘ ସମେତ ଜିଲ୍ଲାର ସମସ୍ତ ସଂଗଠନ ଓ ରାଜନୈତିକ ଦଳ ସାମିଲ ହୋଇଛନ୍ତି ।

ସକାଳ ୬ଟାରୁ ଏହି ୧୨ଘଣ୍ଟିଆ ବନ୍ଦ ଡାକରାରେ ବିଭିନ୍ନ ସଂଗଠନଙ୍କ ସହ ଜନସାଧାରଣ । ସମର୍ଥନ ଦେଇ ସାମିଲ ହୋଇଥିବା ଦେଖିବାକୁ ମିଳିଛି । ଫଳରେ ଢେଙ୍କାନାଳ ସହରର ସମସ୍ତ ଦୋକାନ ବଜାର ସଂପୂର୍ଣ୍ଣ ବନ୍ଦ ରହିଛି। ଢେଙ୍କାନାଳ ଜିଲ୍ଲାପାଳଙ୍କ କାର୍ଯ୍ୟାଳୟରେ ଆନ୍ଦୋଳନକାରୀ ତାଲା ପକାଇ ଦେବାସହ ସ୍କୁଲ କଲେଜଠାରୁ ସରକାରୀ ବେସରକାରୀ ପ୍ରତିଷ୍ଠାନ ପର୍ଯ୍ୟନ୍ତ ସବୁ ଅଚଳ କରିଦେଇଛନ୍ତି।

ସେପଟେ କଲେଜ ବାଏପାସ, କୋରିଆଁ ଓ ମହିଶାପାଟ ଛକରେ ଏନଏଚ-୫୫କୁ ଆନ୍ଦୋଳନକାରୀମାନେ ଅବରୋଧ ଜାରି ରଖିଛନ୍ତି । ଫଳରେ ଜାତୀୟ ରାଜପଥ ସମେତ ଢେଙ୍କାନାଳ ସହର ଦେଇ ସମସ୍ତ ଗାଡି ଚଳାଚଳ ଏକଦମ୍ ଠପ୍ ହୋଇଯାଇଛି । କେବଳ ରେଳ ଚଳାଚଳକୁ ବାଦ ଦିଆଯାଇଛି ।

ତେବେ ସହର ମଧ୍ୟରେ ଦଳ ଦଳ ହୋଇ ଆନ୍ଦୋଳନକାରୀ ପିକେଟିଂ କରୁଥିବା ଦେଖାଯାଇଛି। କହିବାକୁ ଗଲେ ଏହି ବନ୍ଦ ଡାକରାକୁ ଜିଲ୍ଲାବାସୀ ପୂର୍ଣ୍ଣ ସମର୍ଥନ କରୁଥିବାରୁ ଢେଙ୍କାନାଳରେ ସାଧାରଣ ଜୀବନ ଯାତ୍ରା ଠପ୍ ହୋଇଯାଇଥିବା ପରିଲକ୍ଷିତ ହୋଇଛି।

   Related Posts