ନୂଆଦିଲ୍ଲୀ, ୨୫/୦୯: ଦିଲ୍ଲୀ ପାଖ ନୋଏଡା ସହରରେ ଏକ ଅଭାବନୀୟ ଘଟଣା ଘଟିଛି । ଦୋଳି ଖେଳୁ ଖେଳୁ ଜଣେ ଶିଶୁର ବେକରେ ଦଉଡ଼ି ଫଶି ରହିଯିବାରୁ ତାର ମୃତ୍ୟୁ ହୋଇଛି । ଘଟଣା ଜଣାପଡ଼ିବା ପରେ ପୋଲିସ୍ ପହଞ୍ଚି ମୃତଦେହ ଜବତ କରି ପୋଷ୍ଟମର୍ଟମ କରିବାକୁ ପଠାଇଥିବା ଜଣାପଡ଼ିଛି ।
ମିଳିଥିବା ସୂଚନା ଅନୁସାରେ, ନୋଏଡା ୩୯ ଥାନା ଅଞ୍ଚଳର ସେକ୍ଟର ୧୦୪ ପାଖାପାଖି ରହୁଥିବା ଜଣେ ୧୧ ବର୍ଷୀୟ ଝିଅ ଦୋଳି ଖେଳୁଥିବା ବେଳେ ବନ୍ଧା ଯାଇଥିବା ରଶିରେ ତାର ବେକ ଫଶି ଯାଇଥିଲା । ଯାହାଫଳରେ ପିଲାଟିର ଶ୍ୱାସରୁଦ୍ଧ ହୋଇ ମୃତ୍ୟୁ ହୋଇଯାଇଥିଲା ।
ସେକ୍ଟର ୩୯ ଥାନା ଅଧିକ୍ଷକ, ରାଜିବ ୱାଲିଆ ଏନେଇ କହିଛନ୍ତି ଯେ, ସେକ୍ଟର ୧୦୪ ରେ ରହୁଥିବା ହରି କୁମାରଙ୍କ ଝିଅ ସିମରନ୍ ଘର ବାହାରେ ଲାଗିଥିବା ଦୋଳିରେ ଝୁଲୁଥିଲା । ଏହି ସମୟରେ ଅସାବଧାନତା ସହିତ ରଶି ତା ବେକରେ ଗୁଡ଼ାଇ ହୋଇଯାଇଥିଲା । ଗମ୍ଭୀର ଅବସ୍ଥାରେ ସିମରନ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ହେଲେ ଡାକ୍ତର ଝିଅଟିକୁ ମୃତ ଘୋଷଣା କରିଥିଲେ । ତେବେ ପୋଲିସ୍ ଏନେଇ ପୋଷ୍ଟମର୍ଟମ ରିପୋର୍ଟ ଆସିବା ପରେ ତଦନ୍ତ ଆରମ୍ଭ କରିବ ବୋଲି ଜଣାପଡ଼ିଛି ।