ଗୌହାଟୀ ୧୮।୧୧: ଗୌହାଟୀ ସ୍ଥିତ ଲୋକପ୍ରିୟ ଗୋପିନାଥ ବାରଦୋଲୋଇ ଅନ୍ତର୍ଜାତୀୟ ବିମାନ ବନ୍ଦର ନିକଟରେ ମଙ୍ଗଳାବାର ଦିନ ବାୟୁସେନା କର୍ମଚାରୀଙ୍କ ପୋଷାକରେ ବୁଲୁଥିବା ପ୍ରାୟ ୧୧ ଜଣଙ୍କୁ ଗିରଫ କରାଯାଇଛି । ଏ ନେଇ ପୋଲିସ ସୂଚନା ଦେଇଛି । ପୋଲିସର ସୂଚନା ଅନୁସାରେ ଅଜାରା ଥାନା ପୋଲିସ ଏମାନଙ୍କୁ ଏୟାରପୋର୍ଟ ନିକଟବର୍ତ୍ତୀ ଅଞ୍ଚଳରେ ଦେଖିବାକୁ ପାଇଥିଲା ।
ଗୌହାଟୀ ପୋଲିସର ଅତିରିକ୍ତ ଡେପୁଟି କମିଶନର (ପଶ୍ଚିମ) କହିଛନ୍ତି ଯେ, ତାଙ୍କ ଚାଲି ଚଳନରୁ ସନ୍ଦେହ ସୃଷ୍ଟି ହୋଇଥିଲା । ଫଳରେ ସେମାନଙ୍କୁ ଧରି ପୋଲିସ ଥାନାକୁ ଅଣାଯାଇଥିଲା । ପରେ ସମସ୍ତେ ବାୟୁସେନା କର୍ମଚାରୀଙ୍କ ପୋଷାକରେ ଥିବା ଜଣାପଡିଥିଲା । ସେମାନଙ୍କ ନିକଟରୁ କାର୍ ଏବଂ ବାଇକ୍ ଜବତ ହୋଇଛି ।
ସେମାନଙ୍କ ମଧ୍ୟରୁ ଜଣେ ଭୋପାଳର ବିଡିଏସ ଛାତ୍ର ଅଛନ୍ତି । ସେ ଅନ୍ୟ ୧୦ ଜଣଙ୍କୁ ବାୟୁସେନାର ଚତୁର୍ଥ ଶ୍ରେଣୀ କର୍ମଚାରୀଙ୍କ ଜାଲ ନିଯୁକ୍ତି ପତ୍ର ଏବଂ ପରିଚୟ ପତ୍ର ଦେଇଥିଲେ । ସମସ୍ତଙ୍କୁ ପାଟ୍ରୋଲିଂ ପାଇଁ ବିମାନବନ୍ଦରକୁ ଅଣାଯାଇଥିଲା ।
